A Deputación da Coruña finaciará con 30 000 euros o proxecto I+P Incuba do Cluster Audiovisual Galego. Así o acordaron esta mañá na firma do convenio a titular do departamento de Cultura provincial, Natividade González, e o presidente da entidade referencia no sector, Alfonso Blanco. 

«Na área de Cultura da Deputación, o BNG aposta polo audiovisual galego como elemento clave na promoción das nosa cultura e da nosa historia, e tamén como xerador de emprego e riqueza», sinalou González. «O noso audiovisual vive, ademais, un momento de grande esplendor, con proxectos e profesionais de altísimo nivel. Hai talento, creatividade e emprendemento, e para esta institución é unha prioridade o acompañamento e apoio a este sector tan relevante para o país».

Unha desas iniciativas é I+P INCUBA, un programa de incubación e plataforma de pitching onde participan profesionais e empresas que superen previamente un proceso de selección, e que ten como obxectivo a incubación e mellora significativa de seis proxectos audiovisuais na fase de desenvolvemento a través de titorías, webinarios e consultoría.