O Teatro Colón da Coruña acollerá o vindeiro 10 de febreiro, ás 19 horas, a gala de entrega dos nove certames culturais que a Deputación convocou e outorgou en 2022. Recollerán o seu galardón unha ducia de persoas e entidades, nunha velada que recuperará a escenografía do pasado ano e que estaba especialmente deseñada a partires da idea de simbolizar a luz que a cultura, a través de diversas manifestacións artísticas, aporta á sociedade.

Aberta ao público en xeral, con asistencia de balde ata completar capacidade, estará conducida pola xornalista Marga Pazos e contará coa actuación da contadora Carmen Conde e coa música de Antía Muíño. Ademais dos premiados e premiadas, tamén se espera que asistan as persoas que participaron de xeito directo no desenvolvemento dos certames, en calidade de xurados, comisariados e comisións lectoras.

«Esta entrega de premios», salienta o responsable provincial de Cultura, Xurxo Couto, «é un dos maiores encontros culturais do ano, non só polo recoñecemento ao talento dos creadores e creadoras do noso tempo senón tamén porque implica a unha gran diversidade de disciplinas artísticas».

Os galardonados e galardonadas recibirán a escultura creada pola artista Soledad Penalta para a Deputación da Coruña: un 'C' realizado en aceiro que representa o 'C' de Cultura e o 'C' da Coruña, termado na base por siluetas que representan a xente que sostén e que eleva a cultura.

Relación de premios e persoas e entidades premiadas

• Premio Torrente Ballester de narrativa en galego: Amador Castro
• Premio González Garcés de poesía: Yolanda Castaño
• Premio Raíña Lupa de literatura infantil e xuvenil: Lois Pérez
• Premio Luís Ksado de creación fotográfica: Brais Lorenzo
• Premio Castelao de banda deseñada: Siqi Luis Yang (debuxante) e Uxía Larrosa Villanueva (guionista), na modalidade xeral; e Francisco Pérez Villanueva, na modalidade LIX
• Premio Fran Pérez 'Narf' para grupos e artistas musicais: Mallou
• Premio Antón Fraguas de artesanía: Carmen Riveiro, na modalidade tradicional, e Verónica Moar, na modalidade contemporánea
• Premio Internacional Jesús Núñez de arte gráfica: Myriam Gesalaga Eizagirre
• Premio Begoña Caamaño á acción cultural pola igualdade de xénero: Federación galega de redeiras artesás O Peirao, na modalidade traxectoria; e grupo de traballo Igualdade e Xénero ANPA do CEIP de Barouta, na modalidade iniciativa