A primeira cita das xornadas Malas Linguas empezou cunha constatación. "Non estamos no mesmo lugar nin contexto de hai uns anos, senón padecemos unha ofensiva contra o galego e a súa lexitimidade moi forte; por iso hai que traballar contra os contexto de opresión", advertiu a vicepresidenta da Deputación, Goretti Sanmartín. 

Na primeira mesa, o profesor e escritor Suso Fernández Acevedo fixo un repaso polos principais rasgos da situación actual do galego na súa relación coas políticas públicas. E propuxo un provocador  cambio de normalización por igualación, facendo referencia a eliminar os privilexios dunha lingua sobre outra. Así mesmo, centrou o debate sobre a lexitimidade das políticas de dsicriminación positiva do galego, tendo en conta que "axudar ao máis débil non é discriminar", planteando o beneficioso que sería que en todos os ámbitos o galego fose utilizado como "lingua por defecto".

Pola súa banda, a actriz María Vázquez compartiu a súa relación da lingua desde a súa experiencia profesional e persoal. Despois, na segunda mesa de debate presentáronse as experiencias do proxecto europeo Tosta na voz da entidade vasca Topagunea, a plataforma catalá SomEscola e a galega A Mesa pola Normalización. A xornada da tarde centrase nos discursos sobre o galego, e nela participaron Nel Vidal e Valentina Formoso.

A próxima cita de Malas linguas será o próximo 29 de novembro, baixo o título de Lingua e memoria: transmisión familiar da lingua, e estará centrada en explorar a historia do abandono da lingua galega e de que xeito esa interrupción na transmisión chegou ate hoxe.

As seguintes dúas xornadas, a celebrar en marzo e abril de 2019, centraranse na relación d alingua coa mocidade e cos xéneros. Pódese consultar o programa completo da primeira xornada de Malas linguas aquí: https://www.dacoruna.gal/normalizacion-linguistica/malas-linguas/