Un total de 131 empresas e servizos de Santiago recibiron na Casa das Asociacións de Cornes compostelá a distinción do Sistema Integral de Calidade Turística Española en Destino, un programa da Secretaría de Estado de Turismo co que colabora a Deputación da Coruña. No acto participou, en representación do departamento de Turismo provincial, Xosé Penas, a quen acompañaron a concelleira e a xerente de Turismo de Santiago, Míriam Louzao e Flavia Ramil, e o presidente da Asociación Profesional de Guías de Turismo de Galicia, Joaquín Rubal.

Comezou Penas a súa intervención desculpando a ausencia por motivos de axenda do vicepresidente e titular de Turismo da Deputación, Xosé Regueira. «El hoxe non pode estar, pero sabedes do seu traballo e implicación persoal co turismo da provincia e en xeral de todo o noso país».

«Falar de turismo e da excelencia e da calidade no eido turístico», afirmou Penas, «é algo sumamente transversal, e por iso na área de Patrimonio da Deputación sempre apostamos pola combinación no traballo e na xestión turística dende o punto de vista da propia excelencia e do respecto polo patrimonio e a cultura en xeral». Para o deputado, esa aposta reflíctese «en accións que fomenten o traballo no turismo como elemento diferenciador, buscando un perfil afastado da idea simplista do turismo de masas e apoiando proxectos a prol da integración cultural, económica, social e patrimonial».

Penas falou de «Patrimonio en maiúsculas, pois patrimonio non implica soamente a xestión física das pedras ou elementos arquitectónicos: implica o respecto máximo por todo aquel patrimonio que nos rodea, o patrimonio inmaterial dun país milenario». E falou tamén de medio ambiente e paisaxe, «que fan de nós un territorio singular na procura da posta en valor de todo aquilo que facedes todos vós para evitar as agresións que sufrimos a diario, as que sufrimos e as que pretenden que suframos, ás veces cuestinando o inmenso traballo, non sempre recoñecido, que hai detrás de asociacións e empresas».

Segundo Penas, «actos coma este que nos reúne hoxe premian e valoran o labor de todas aquelas empresas, xestoras e persoas que facedes que todo iso sexa posible; un labor que mestura a protección do patrimonio, a promoción turística, a excelencia e por suposto a rendibilidade económica, porque todos temos que poder vivir do noso traballo e se é posible na nosa terra, esa terra que temos que coidar e deixar mellor do que a atopamos».

Para rematar, o deputado de Patrimonio destacou «o traballo que neste eido se fai dende administracións coma o Concello de Compostela, Turismo de Santiago ou a propia Deputación da Coruña; traballo que sen dúbida non sería nada sen todo o tecido sectorial que estades detrás dese labor nun sector altamente complicado e moitas veces prexulgado, sector que tedes un compromiso demostrado co territorio e coa xeración dunha economía social e integradora».