A deputada de Igualdade, María Muíño, entregou esta mañá os Premios Luís Villalta pola igualdade aos oito proxectos culturais seleccionados nesta edición do certame, convocado pola Deputación da Coruña. Cada un deles recibirá unha achega en metálico de 12 500 euros . Este ano, e como novidade, as iniciativas debían estar xa iniciadas ou con continuidade no ano 2020.

“Estamos moi satisfeitas pola diversidade en temáticas, disciplinas, ideas e inquedanzas que representan o conxunto dos oito proxectos”, asegurou Muíño durante o acto de entrega, ao tempo que engadiu que “todos obedecen ao obxectivo de impulsar unha sociedade máis xusta e máis democrática”. Nesta convocatoria resultaron premiados desde unha proposta de tradución feminista entre linguas non hexemónicas ata unha iniciativa multidisciplinar que compila testemuñas de mulleres vítimas do franquismo, pasando por audiovisuais e montaxes escénicas.

No acto, celebrado na sede da Deputación, participaron presencialmente representantes de cinco dos proxectos premiados: Victoria Pérez Varela, de Os nenos da variola; Gemma Marqués Redondo, de Anónimas; Carmen Cotelo e Alba Fernández, de As Mapoulas; Isa Risco e Nacho Fungueiriño, de Bravas; e Domingo Docampo, de Traballadoras da liberdade.

Muíño tamén aproveitou para facer referencia á nomina de propostas seleccionadas nas dúas edicións anteriores e que suman un total de 28, que a deputada cualificou como “proxectos motores da igualdade”. Tamén mencionou de xeito especial a quen dá nome ao premio, Luísa Villata, “poeta, narradora e dramaturga que na súa obra tivo sempre presente a consciencia de ser muller, de vivir nunha sociedade onde os homes e as mulleres están marcados de maneira moi diferente polo feito de selo”.

Proxectos seleccionados

As Mapoulas. Mulleres libres de Monte Alto/As Atochas, casas refuxio Laboratorio Escénico S. Coop. Galega

Creación escénica onde se mestura a dramaturxia teatral, a danza, a música, a poesía e o vídeo. A obra céntrase na figura histórica de Alicia Dorado, anarquista panadeira de 25 anos, e na súa casa refuxio na rúa do Carmen, na cidade de A Coruña. O proxecto trata a vida das casas refuxio, a militancia, o compromiso, as relacións coas outras compañeiras, o barrio e a liberdade nun contexto de gran represión que remata o 10 de xullo de 1937 coas mortes de Dorado e doutras compañeiras/os nun asalto policial.

Os nenos da varíola. Victoria Pérez Varela

Adaptación teatral para público xuvenil e adulto da novela homónima de María Solar. Un proxecto escénico de divulgación científica, memoria histórica e de posta en valor dunha muller pioneira esquecida pola historia: Isabel Zendal. Destaca pola súa capacidade de sensibilización e visibilización da igualdade de xénero na ciencia, e por motivar a reflexión sobre a transcendencia da memoria histórica, ao tempo que incorpora medidas de accesibilidade universal a través da adaptación física, a subtitulación e o acompañamento auditivo.

BRAVAS. Culturactiva S. Coop. Galega

Propón a posta en valor do papel das mulleres na historia a través do teatro e inclúe, ademais da posta en escea, a realización de vídeos e unidades didácticas. Este proxecto destaca pola capacidade de promoción da igualdade con impacto social e innovación, e pola procura de solucións a problemas sociais a través do traballo colaborado co alumnado.

Traballadoras da liberdade. ABA Films 1 SL

A partir da compilación de testemuños de mulleres vítimas do franquismo, plantexa a realización dun libro, un audiovisual, unha exposición e unha unidade didáctica. O proxecto está coordinado co tecido asociativo con capacidade de reflexión sobre a memoria histórica e incorpora medidas que garanten a accesibilidade para persoas con discapacidade auditiva e visual principalmente.

Proxecto Anónimas. Gemma Marqués Redondo

Anónimas, retratos de musas cotiás é un proxecto multidisciplinar que combina publicacións, exposicións, deseño gráfico, pintura mural e cursos desde onde reivindicar a todas as mulleres anónimas, especialmente no rural. O proxecto parte da consideración da arte como elemento transformador, polo que ten gran capacidade de impacto e transferibilidade no territorio.

Sementæ: procesos de tradución feminista entre linguas non hexemónicas. María Reimóndez Meilán

É un proxecto concibido para traballar dende linguas non hexemónicas e alterar o corpus de pensamento e práctica feminista internacional. Inclúe un proceso de selección e tradución de textos dende tres linguas non hexemónicas ademais do galego, a súa tradución intermedia a unha lingua hexemónica e, partindo desta, a tradución ás demais linguas escollidas. O resultado será a elaboración dun repositorio onde estarán accesibles ao público os textos tanto en galego como na lingua orixinal.

Longametraxe documental participativa sobre memoria e relato íntimo feminino: CRÍAS. Xiana Gómez Díaz

Este documental baséase nun arquivo único e pioneiro conformado por materiais da vida cotiá de mulleres contemporáneas: diarios de adolescencia, fotografías, películas e gravacións sonoras recompilados e estudados durante máis de cinco anos. A combinación no filme destes materiais pretende espertar preguntas sobre os espazos íntimos (con marxe para un autorrelato contradictorio, emocións, dúbidas, desexos, experimentos) e públicos (onde un relato alleo é interiorizado, aparecendo o silenciamento e a negación), de xeito que se evidencien cuestións sobre relato, lexitimidade e xénero: quen conta o relato da vida das mulleres? Quen (che) conta a túa propia historia, autorrelato, redescubrimento, espazo propio, segredo, silenciamento, ocultación, negación.

Deben falar. Silvia Fernández Romero

Documental sobre a percepción da violencia de xénero no medio rural, co obxectivo de visibilizar o problema a través dun discurso dialóxico; é dicir, dando o lugar central á palabra das participantes e poñéndolle rostro a cada unha delas. Pon o foco na violencia invisible, entendida como aquela aceptada pola sociedade por se entender como algo diferente da violencia de xénero.