A piques de se cumprir os douscentos anos do nacemento en Betanzos de Antolín Faraldo, o 2 de setembro de 1822, esa vila coruñesa acolle do 26 ao 28 de agosto os Xogos Florais dedicados á figura de quen foi precursor do Rexurdimento, voz dunha xeración e alma e mente da Revolución de 1846. O programa de actividades botou a andar este venres cun acto de inauguración no Claustro de Santo Domingo no que participou María Muíño, responsable de Normalización Lingüística e do departamento de Igualdade da Deputación da Coruña.

“Na figura de Antolín Faraldo”, sinalou Muíño, “atopamos a forza do pensamento e da acción dunha figura que se implicará durante a súa curta vida nos problemas sociais do momento”. “Precursor na consideración da identidade e autonomía da Galiza fronte ao centralismo, nos seus escritos xornalísticos atopamos unha persoa preocupada e centrada en temas como o rol da muller no seu tempo, o suicidio, a cultura galega, a liberdade de prensa ou a separación Igrexa-Estado. Parafraseando a Murguía, atopámonos ante ‘o primeiro e o mellor’, unha figura mítica, dunha relevancia e influencia extraordinarias no noso presente e que, porén, segue a ser moi descoñecida”, engadiu durante a súa intervención, na que estivo acompañada por representantes da Asociación Pesquedellas e do Concello de Betanzos.

“Estes Xogos Florais”, explicou a deputada, “forman parte dunha serie de accións promovidas desde a Deputación ao redor de Faraldo, que arrancaron co apoio ao libro “Querida liberdade. Vida e obra dun precursor do Rexurdimento” (Alvarellos Editora), da autoría do historiador Xurxo Martínez e que se está a presentar en diferentes localidades”. Muíño adiantou que o seu departamento está a traballar na elaboración de pequenos audiovisuais que abordan e recuperan temáticas que Faraldo tratou nos seus artigos xornalísticos. 

O acto conectou a dimensión xornalística de Faraldo cos nosos tempos na presentación de “A Cousa”, proxecto de catro mozas periodistas saídas da Facultade de Comunicación da Universidade de Santiago de Compostela. Non faltou a música neste día de apertura: o espectáculo ‘A drag panderereira’, de MEIGA-i. Os Xogos Florais de Betanzos, ideados e producidos por Proxecto Pesquedellas, forman parte da programación que a área provincial de Normalización Lingüística dedica ao bicentenario de Faraldo.

Os Xogos Florais de Betanzos contan ademais coa colaboración de artistas e creadoras locais, como Factoría Nini e Death or Glory Collective, responsables do deseño das camisolas e bolsas conmemorativas do bicentenario de Faraldo. Todo o programa ten un enfoque participativo e procura a implicación da xente nova nas actividades. “A nosa vila foi un lugar sinalado na loita pola lingua galega no pasado con figuras como Antolín Faraldo ou fitos históricos coma o primeiro discurso público en galego, a Irmandade da Fala de Betanzos ou os propios Xogos Florais”, comenta a Asociación Pesquedellas, colectivo que iniciou a recuperación desta celebración do Rexurdimento cunha primeira edición dos Xogos en 2021.

Os Xogos seguirán toda a fin de semana. O ‘slam’ de poesía, o desfile de traxe tradicional, co Sarillo, e a música, con Donner e os Kebabs, serán protagonistas o sábado 27. Para o domingo 28 entregaranse os premios do certame xornalístico e do ‘slam’ poético, nunha xornada final na que se enxalzará o traxe galego e na que actuará o grupo musical A Tajea. 

PROGRAMACIÓN SÁBADO 27 E DOMINGO 28

Sábado 27
12 horas. Slam de poesía. Café Lanzós.  O Slam Poético é un concurso poético no que cada participante recita a súa creación directo coa particularidade de que o xurado é o público asistente. O concurso constará de dúas roldas nas que cada poeta contará cunha intervención de tres minutos por volta.  Inscricións en [email protected] 
20 horas. Obradoiro de O Sarillo: Desfile de traxe tradicional. Praza da Constitución
21 horas. Actuación musical do cuarteto tradicional ‘Donner e os Kebabs’. Praza da Constitución

Domingo 28
12 horas. Entrega premios Slam Poético e Concurso Xornalístico Antolín Faraldo. Os artigos gañadores serán publicados no suplemento ‘Antolín Faraldo’ do mes de setembro, suplemento do xornal da Asociación dos Comerciantes e Empresarios de Betanzos (ACEBE CCA). A gañadora recibirá 150 € e o segundo premio será de 100 €.  Seguirá o concerto de A Tajea e o Día de Enxalzamento do Traxe Galego. Praza da Constitución. 
Remate dos Xogos cunha foliada en A Cañota.