Un grupo de especialistas da Deputación acompañan os catedráticos en Prehistoria da Universidad de Álcala de Henares, Rodrigo de Balbín e Primitiva Bueno, quen xunto ao profesor da Escola Superior de Conservación e Restauración de Galicia, Fernando Carrera, participaron na supervisión dos traballos de escaneado que se están a realizar sobre os gravados inscritos nas lousas do Dolmen de Dombate.

Os traballos de escaneado láser das lousas do monumento megalítico, coordinados polo enxeñeiro, Roberto Cabeceira, tamén permitirán valorar cal é o estado de conservación actual dos elementos que o integran. "Trátase dunha nova actuación nun ben patrimonial de especial relevancia para a Deputación da Coruña. Con esta nova iniciativa queremos afondar no coñecemento dun monumento que ten moito que dicir da nosa historia e que é un referente da arte megalítica mundial", explicou o deputado de Patrimonio e Contratación da Deputación da Coruña, Xesús Soto.

O Dolmen de Dombate forma parte do Patrimonio da Deputación da Coruña dende o ano 1975, sendo un dos monumentos megalíticos máis senlleiros da comunidade galega, e estando declarado Ben de Interese Cultural dende 1985.