A Xunta pro Devolución do Pazo de Meirás solicitará formalmente que o Goberno central active o proceso de recuperación do Pazo de Meirás para ben público. Este foi un dos acordos que a Xunta pro Devolución tomou na xuntanza que se desenvolveu este mércores na Deputación da Coruña. Na reunión aprobouse por unanimidade ratificar a liña aberta polo informe xurídico e solicitar ao goberno presidido por Pedro Sánchez unha posición activa para iniciar o proceso xudicial que devolva o Pazo de Meirás ao patrimonio público.

Na xuntanza, a vicepresidenta da Deputación da Coruña, Goretti Sanmartín Rei, deu conta dos pasos dados desde que se presentaron os informes histórico e xurídico dirixidos por Emilio Grandío, profesor da Facultade de Historia da USC, e por Xabier Ferreira, profesor da Facultade de Dereito da USC, e das respostas obtidas nas distintas xestións.

Na reunión aprobouse tamén a organización de distintos actos de difusión da situación actual en que se encontra o Pazo de Meirás e da visibilización do espolio que a familia Franco cometeu coa propiedade inmobiliaria.

E aprobouse que, antes do remate do ano, a Deputación da Coruña, en colaboración coa Xunta pro Devolución do Pazo, impulsará e organizará un grande acto no Teatro Colón encamiñado a sumar un amplo apoio social a esta reivindicación central na recuperación da memoria histórica.